कुरुप मनको सुन्दर तस्वीर

प्रिय कवि, 

छातीमा हात राख
आँखा चिम्ल
मस्तिष्क हैन
आत्मालाई सोध
र एउटा कविता लेख ।

मलाई विश्वास छ–

त्यो अझ सुन्दर हुनेछ ।

कविताका शब्दशब्दमा–

तिम्रो कुरुप मनको

सुन्दर तस्वीर कोरिने छ ।

मूर्ख प्लेटोहरु फेरि गर्जिने छन्–

“आदर्श गणराज्यबाट कविहरुलाई निकाल्नु पर्छ”

गर्जिन देऊ–

संसारमा अब आदर्शका लासमात्र छन् ।

संसार–

तिमी जस्तै छ

तिम्रो ख्याति झन् बढ्ने छ ।